हेटौँडा । मकवानपुरको मकवानपुरगढी गाउँपालिका अध्यक्षको घरमा आगलागी हुँदा घर जलेर नष्ट भएको छ । विद्युत् सर्ट भएर मङ्गलवार दिउँसो मकवानपुरगढी गाउँपालिकाका अध्यक्ष दोर्जे लामा स्याङ्तानको घर जलेर नष्ट भएको जिल्ला प्रहरी कार्यालय मकवानपुरले जानकारी दिएको छ ।
गाउँपालिकाको वडा नम्बर ३ धमिलेमा रहेको अध्यक्ष दोर्जेकोे काठ र माटोले बनेको दुईतले घरको पहिलो तला र बुँइकल जलेर नष्ट भएको छ । मकवानपुर प्रहरीका अनुसार घरको भुइँतलामा भने आगलागीबाट आंशिक क्षति पुगेको छ ।
घरमा लागेको आगो हेटौँडा उपमहानगरपालिकाबाट गएको दमकल, प्रहरी र स्थानीयको सहयोगमा करिब दुई घण्टापछि निभाइएको थियो । दिउँसोको समयमा घरमा आगो लागेको र घरमा कोही नभएका कारण मानवीय क्षति भने नभएको प्रहरीले जनाएको छ । आगलागीबाट २५ मुरी धान, १५ मुरी कोदो, १० मुरी मकैं, लत्ता कपडा र अन्य समान क्षति भएको प्रहरीले जनाएको छ ।
प्रतिक्रिया दिनुहोस्