हेटाैँडा । बागमती प्रदेशका मुख्यमन्त्री इन्द्रबहादुर बानियाँले डिउटी समयमा चिकित्सक तथा कर्मचारी अनुपस्थित भेटिएपछि हेटौंडा अस्पताल व्यवस्थापन समितिको ध्यानाकर्षण गराएका छन्। मुख्यमन्त्री बानियाँले जिम्मेवार निकायलाई तत्काल सुधारका कदम नचाले कडा कारबाही गर्ने चेतावनी दिएका छन्।
बानियाँले बुधबार साँझ मदन भण्डारी स्वास्थ्य विज्ञान प्रतिष्ठानअन्तर्गतको हेटौंडा अस्पतालको आकस्मिक अनुगमन गरेका थिए। अनुगमनका क्रममा डिउटी समयमा चिकित्सक तथा कर्मचारी नभेटिएपछि उनले तत्काल अस्पताल व्यवस्थापन समितिका अध्यक्ष भिमसागर गुरागाईंलाई बोलाएर चासो व्यक्त गरेका थिए।
यसै विषयमा बिहीबार मुख्यमन्त्री बानियाँले मुख्यमन्त्री तथा मन्त्रिपरिषद्को कार्यालयमा छलफलसमेत गरेका छन्। छलफलमा मन्त्रालयकी सचिव डा. सुमित्रा गौतम, मदन भण्डारी स्वास्थ्य विज्ञान प्रतिष्ठानका उपकुलपति डा. प्रदीप ज्ञवाली, रजिस्ट्रार, अस्पताल व्यवस्थापन समितिका अध्यक्ष गुरागाईं तथा निमित्त निर्देशक डा. हरिबहादुर खड्का सहभागी थिए।
मुख्यमन्त्रीका प्रमुख स्वकीय सचिव मिलन पुडासैनीका अनुसार छलफलमा मुख्यमन्त्री बानियाँले डिउटी समयमा अस्पतालमा उपस्थित नहुने चिकित्सक तथा कर्मचारीलाई तत्काल सचेत गराई सुधार गर्न निर्देशन दिएका छन्। निर्देशन कार्यान्वयन नभए प्रदेश सरकारले गैरजिम्मेवार चिकित्सक, कर्मचारी तथा अस्पताल प्रशासनमाथि आवश्यक कारबाही गर्ने स्पष्ट चेतावनी पनि दिइएको छ।
मुख्यमन्त्री बानियाँले कर्मचारी तथा चिकित्सकले बिदामा बस्दा कम्तीमा एक दिनअघि जानकारी गराउन, बिरामीको सेवामा असर नपर्ने गरी डिउटी मिलाउन तथा डिउटी समयमा अनिवार्य रूपमा पोशाक लगाउन निर्देशन दिएका छन्। स्वास्थ्य उपकरण चुस्तदुरुस्त अवस्थामा राख्न र अस्पताल परिसरमा सरसफाइमा विशेष ध्यान दिन पनि उनले आग्रह गरेका छन्।
नागरिकलाई गुणस्तरीय र प्रभावकारी स्वास्थ्य सेवा उपलब्ध गराउनु प्रदेश सरकारको प्राथमिकता रहेको उल्लेख गर्दै मुख्यमन्त्री बानियाँले अस्पताल प्रशासनलाई जिम्मेवार र परिणाममुखी ढंगले सेवा प्रवाह गर्न सचेत गराएका छन्।
प्रतिक्रिया दिनुहोस्